城中鏡：嶺大頒院士 包陪慶獲老友捧場
「船王」包玉剛女兒Anna包陪慶、立法會前議員「蘇菲」梁劉柔芬、「搪瓷大王」陳兆民嫡孫James陳禹嘉等五位社會傑出人士，日前獲嶺南大學頒授榮譽院士銜。當日蘇菲老公梁孔德同三個仔女齊齊現身支持，囝囝同女婿仲全程充當攝影師，溫馨程度令旁邊嘅Anna都忍唔住講句「好羨慕」！
包陪慶（左）同姜瑜（右）外形有啲相似，而且感情特別好。
陳禹嘉（右）兩個仔女去咗英國升學，幸有太太李淑慧（左）甜蜜伴隨。
梁劉柔芬（中）全家出動晒溫馨，左起為二仔梁耀宇同新抱馬桂敏、老公梁孔德；右起為細仔梁麒繕、女婿林震宇同大女梁穎宇。
難得見面雞啄唔斷
其實Anna都唔使咁羨慕嘅，雖然佢兩個囝囝並未現身，但都有唔少老友嚟捧場，當中最具分量嘅要數外交部駐港副特派員姜瑜，事關姜瑜向來低調，好少出席私人活動，今次都專程去賀Anna。佢哋兩個姊妹情深，一見面就拖實對方雙手雞啄唔斷，足足幾分鐘先肯放手。
蘇菲話近年好積極做運動，事關覺得活動即係「活着就要動」，所以每朝早都同老公去馬會會所玩跑步機出一身汗，次次都做成個鐘。咁最近有乜投資心水？佢就笑笑口咁話已經冇做投資，自退出立法會後，將精神放晒喺自己創辦嘅青年企業家發展局上，其餘時間就用嚟湊三個孫喎！
至於首次獲頒榮銜嘅James，企喺台上時表現有啲緊張，台下嘅太太李淑慧就好醒目咁做手勢，提示老公要保持笑容。James嘅三個仔女未有現身，陳太話大仔同二女已經去咗英國留學，得番細仔喺身邊，雖然唔習慣屋企靜咗咁多，但覺得仔女性格比較適合外國升學。
