SUN搞作：少膽虫手記：打唔成台灣牌
是日也，淫賤黎約雀局，點知三缺一，搵少膽虫頂上。少膽虫好奇問：「乜民主阿婆又去恤髮，搞事四人幫唔齊人咩？」淫賤黎聽見無即刻答，鬼鬼祟祟，拉埋窗簾先話:「我約咗兩個抬毒分子嚟共商港是，唔想畀阿爺同外人知，咪搵埋你囉！」
少膽虫心頭一甜，喜獲腦細推心置腹，頭腦發熱：「好橋啊！用中國傳統賭博文化包裝反中國民粹高風險博奕活動，高章！高章！」豈知淫賤黎仍舊是一巴:「高章有Q用?等陣鬆章仲好啦！」
一坐低，淫賤黎就同鬍鬚佬屍鳴得話:「打台灣牌好無？我想打好耐喇！」另一人就插嘴：「台灣牌個個打得，係飯民有原罪，唔打得。」正是理論大師淋瀆水。淫黎死死地氣打番廣東牌，但一睇牌，又喜上眉梢，用腳趾踢一下少膽虫，再指住自己個樣。
少膽虫點會唔知佢咩樣？於是諗住打隻西畀佢，但係隻西一出，淋瀆水大叫：「咁快有西可佔？正！」即槓再自摸紅中，食咗胡！淫賤黎發脾氣，一手搶走紅中，大喊：「少膽虫你玩嘢？係人都知我要佔呢隻中！你即刻跟我入房！」少膽虫終於明隻「中」點解係血紅色……
