設計圖片
有泛民主派議員建議引用《立法會（權力及特權）條例》要求政府公開行政會議討論電視發牌嘅內部文件，由於引用特權法需立會分組點票通過，即係地方直選同功能界別各有十八票贊成至可通過，泛民喺地區直選當然無問題啦，但功能界別就視乎建制派取態。
據理解，以前撐開政府嘅個別功能界別議員仲未決定點投票，反而過往閃閃縮縮嘅醫學界「怪醫」梁家騮竟然斬釘截鐵話會投票支持，係真唔係就要留意佢到時有冇影喇！另外，建制派內部亦密切注視實體育、演藝及文化出版界馬逢國嘅投票取向。
根據過往一年觀察，馬逢國嘅立場都係撐政府居多，但今次政府免費電視發牌風波，演藝界以至泛民都要求政府公開發牌「謎底」，佢作為業界代表，究竟會點投票呢？我哋問佢到底撐邊面，佢就答得好玄，話政府應該解釋清楚少少，例如點解只係發兩個牌。至於係咪贊成引用特權法要求政府公開行會資料，佢就無正面回答，只係話要睇睇政府點解釋先再決定，現時好難講投票取態喎！
同樣未決定投票取向嘅，仲有直選議員謝偉俊、工業界林大輝同部分功能界別議員，如果佢哋支持政府、投反對票，咁政府應該會大步檻過，所以政府內部評估，最緊要係睇實一眾建制派功能界別議員投票，一票都不能少，但未來民情走勢係點樣發展，相信政府都好難掌握。
第一手消息請下載on.cc東方互動
