政壇：馬化騰千七萬奪徐悲鴻名畫
由內地商界創立、專幫國內愛滋孤兒、殘疾兒童康復嘅「愛佑慈善基金會」舉行慈善晚宴，雲集內地一線商界名人參與拍賣環節，騰訊主席馬化騰以一千七百萬元（人民幣．下同）全場最高價，投得「中國近代繪畫之父」徐悲鴻嘅珍貴作品，成為全場最矚目嘅買家。
騰訊市值啱啱破八千億港元，千七萬對馬化騰嚟講濕濕碎。（資料圖片）
呢幅名畫由萬達集團董事長王健林捐贈，眾所周知王健林嗜好係收藏名畫，佢拎得出嚟嘅畫作，身價自然有番咁上下，聽講畀拍賣行專業人士估價，一睇到出自徐悲鴻大師嘅手筆，一開始就叫賣八百萬元，經過幾輪競價，最後以一千七百萬元高價成交。馬化騰咁大手筆投呢幅畫，除咗為慈善，唔知係咪趁出年係馬年，想順便討個好意頭呢？之不過，對馬化騰嚟講，一千七百萬可以話係濕濕碎，騰訊市值啱啱破八千億港元，佢持有百分之九股權，市值成七百二十億港元！
至於嗰晚慈善晚宴，百度創辦人李彥宏當晚都以三百九十萬元投得中國當代藝術家張曉剛嘅作品，全晚活動就一共籌得五千六百八十八萬元，作為「孩子們的快樂成長」慈善用途。
