政壇：馮婉眉新形象冧印度客
雖然滙控上禮拜至先公布退出印度零售業務，但並唔代表佢哋唔重視印度市場。前日滙豐就為一年一度嘅印度屠妖節舉行酒會，唔單只有香港區總裁馮婉眉同香港工商業務主管陳樑才等高層及四百幾位客戶賞面出席，仲請嚟一班美艷嘅印度西施助興，場面熱鬧。當日布置金壁輝煌，金色背景板上排滿七彩吊飾，民族風味濃厚，排場十足，啱晒印度客戶品味。
馮婉眉（中）穿上鮮色外套，打扮搶鏡。
一向着開純黑套裝嘅銀行高層當晚都入鄉隨俗，當中以馮婉眉一件深粉紅色絲質外套最搶鏡，一洗平日嚴肅嘅形象。
屠妖節又叫排燈節，好似我哋農曆年或者外國嘅聖誕節咁重要，當地人不論宗教，一齊連續歡度五日。滙豐為屠妖節搞酒會已經超過十年，同印度客戶打好關係，應該贏得唔少印象分。今年屠妖節會喺十一月三號下禮拜日開始。
