政壇：家長聯署轟教協抹黑
中學文憑試通識科呢兩年考試包括拉布等必答題，立法會議員梁美芬早前就話通識科已經政治化，主張取消必答題。點知呢個建議一石激起千重浪，由馮偉華任會長嘅教協反駁話梁美芬上綱上線，兩者喺報章足足「筆戰」咗一個月有多，直到尋日，輪到梁美芬發動成千個家長聯署，去信抗議教協抹黑，睇嚟呢單嘢真係沒完沒了！
設計圖片及對白
雙方筆戰個幾月
其實早喺今年初，當教協製作「佔領中環」教材時，梁美芬就跳出嚟批評內容偏頗，涉嫌推銷佔中，最終教協都有作出修改。梁美芬到八月尾就成立關注通識教育聯席會議，仲做埋召集人。梁美芬話通識科嘅必答部分都涉及政治議題，側重政治元素，又驚學生受教師政治取向影響，會有潛在角色衝突，取消必答部分，就可以保障熟悉其他議題嘅學生。
不過，梁美芬呢個建議惹嚟多方批評，其中教協就多次撰文批評佢抹黑教師專業操守。雙方筆戰多回，至本月初，教協動用《教協報》要求佢立即收回言論並公開道歉。
梁美芬尋日就發新聞稿，話有大概一千名家長聯署公開信，要求當局改善通識科，其中代表蔡克健撰文，話通識科冇客觀評分標準，因為唔同老師有唔同意見，又話爭議性好大嘅事，專家都兩極化，好難評論，加上事件仲未發生，又點評論？擺到明就講緊佔中。
公開信反指教協抹黑梁美芬，話教協製造白色恐怖，要求對方撤回道歉要求，又要求教育局修改通識科內容同考核方法，變得客觀啲，並且希望通識科成績唔用嚟作升學計分用途。教協尋日未有回覆查詢，唔知佢哋幾時再寫文反駁呢？
