奪命陷阱三支香 官僚不仁民遭殃

嗱，又出事嘞。一名新移民少婦喺牛頭角屋邨住所晾衫，懷疑探身窗外時失去平衡，當場墮樓死亡。死者三歲兒子目睹意外經過，但一直唔知痛失至親嘅噩耗，放學後仲不斷要搵媽媽，令見者心酸。更令人心酸嘅係，死者家庭經濟拮据，連同家姑、叔仔等八人蝸居三百幾呎斗室，懷疑因為負擔唔起，未有更換安全款式晾衫架，結果釀成悲劇。太陽報愛心基金本住救急扶困精神，從「無力殮葬」專戶撥款，幫助家人處理死者身後事，真係功德無量。

唉，奪命陷阱三支香，居民無處話淒涼。究竟仲要死幾多人，港產官僚先至肯正視問題，更換呢種攞命晾衫架吖？一次就話意外啫，五十年來居民墮樓事故不絕，新聞早已變成舊聞，依家舊聞又變成新聞，悲劇不斷重演，港產官僚咁都闊佬懶理，關人個關，講得好聽啲係麻木不仁，講得唔好聽根本就係草菅人命！

其實，港產官僚唔係唔知三支香晾衫架危機四伏，只係知道都懶得更換啫。嗱，○四年當局推出半資助計劃，話津貼居民更換較為安全嘅鋁質拉輪式晾衫架喎，證明當局心知肚明三支香設計唔安全啦，咁點解拖到依家仲有三支香呢？港府窮到只剩下錢，就算一力承擔更換晒全部晾衫架，都只係九牛一毛啫，咁都唔肯做，唔通喺港產官僚心目中，市民嘅性命真係不值一錢？可以咁講，如果房屋署肯承擔責任，主動拔除三支香，今次悲劇就唔會發生。所以話，真正嘅殺人兇手唔係晾衫架，而係官僚作風！

話時話，官僚作風真係害人不淺o架 ，麻木不仁固然可惡，疏懶失職更加可恨。公屋居民平日生活可以講係危機四伏，唔止晾衫怕墮樓，而且搭升降機怕急墮，落街怕墮物，而公屋走廊設計失誤，九曲十三彎，少女夜歸更加怕墮入淫賊魔掌。

總而言之，三支香設計好有問題，晾衫竹變成奪命竹，簡直危機四伏，仲唔快快拔除，慘劇可能陸續有來吖。不如咁嘞，居民每次晾衫不妨當向房署官僚上香，求吓佢哋做好呢份工，以民為本吖，叮！