城中鏡：鄭詩韻周圍飛 囝囝掛到喊
尋日喺一個活動中見到名媛鄭詩韻，佢明顯比之前瘦咗。點解？原來係因為近期忙於為工作周圍飛，佢話：「我一上機就瞓，無食嘢。」咁忙咪無時間湊兩個囝囝？佢直認：「都係㗎，有次我返到屋企，囝囝見到我竟然喊，我問佢咩事，佢喊住話好掛住媽咪，今個星期好啲，要好好補償。」
因為忙於工作周圍飛，鄭詩韻明顯消瘦咗。
最近大批內地雙非家長爭住為仔女撲北區嘅幼稚園學位，搞到北區家長要上街遊行，要求政府確保佢哋嘅仔女有足夠學額，鄭詩韻亦有留意呢單新聞，又話啲家長好辛苦添，佢仲透露佢大仔依家三歲半，細仔就兩歲半，佢都好擔心幼稚園學位嘅問題，佢話：「過兩年就到我為囝囝搵小學喇。」被問及會唔會訓練定囝囝先？佢就話：「自己開始留意多咗，要知多啲，但就唔會提早訓練定佢，依家要畀佢哋做正常小朋友做嘅嘢。」
