環保社會企業Green Monday同香港國際機場，趁住尋日係世界糧食日啟動「無肉星期一」協議，行政會議成員Bernard陳智思、民政事務局副局長Florence許曉暉獲邀主禮。茹素逾二十年嘅Florence話兩個囡囡都係素食者，而且運用妙計逼到食開肉嘅老公都要乖乖食齋。

機場內逾半食肆推出周一素菜餐單，賣相同味道都不比葷菜遜色。

許曉暉話食素好處多，連臉上雀斑都會少啲。

陳智思對飲食好謹慎，身體三十年來得以維持狀態。

魏華星（左）同Green Monday業務發展總監吳詠琛推廣素食。

究竟Florence有乜妙計逼老公就範食齋呢？佢話：「老公一打開屋企個雪櫃，Well，全部都係五穀、蔬菜生果、果仁，冇得畀佢揀！」於是食素成為佢老公唯一選擇，搞到奶奶要買肉類「接濟」個仔。佢坦言，初初長輩都有擔心兩個囡囡茹素會唔夠營養，但眼見囡囡快高長大又冇乜病痛，都放心畀佢哋繼續食齋。

陳智思戒紅肉

至於早年患有血管病嘅Bernard，腎功能只得常人嘅一半，所以對食物嘅選擇更加小心，多年來堅持戒食紅肉，只食雞、魚同蝦，食沙律唔落醬汁，亦盡量避開有芡汁嘅菜式，令身體三十年來維持狀態，佢笑言：「以一個唔正常嘅人嚟講，已經算正常。」佢為咗令狀態更Fit，近半年多菜少肉、恒常運動下減多七磅，依家維持一百五十四磅。

Green Monday創辦人楊大偉同魏華星就話，香港國際機場係全球首個全面推行素食嘅機場，現已有五十七間食肆同貴賓室響應，喺每周一甚至每天供應素食，預計每年最多可減少超過四千公噸碳排放。

第一手消息請下載on.cc東方互動iPhone/iPad/Android/Windows Phone Apps