政壇：搞搞政：搞廣東計劃 工聯會白做
勞工及福利局局長張建宗早前講過，喺今年八月開始接受合資格長者申請嘅「廣東計劃」反應唔錯，原來當局之前曾招標搵機構代理，而工聯會喺廣州、深圳同惠州等地有諮詢服務中心，一心以為中標機會高啲啦，但奈何政府標書規定入標機構要係慈善機構，又要喺內地有若干年服務經驗，基於工聯會嘅中心唔係以慈善機構註冊，自然中標無望，最終由香港國際服務社冷手執個熱煎堆中標，合約為期三年。睇嚟連工聯會嘅理事長吳秋北都始料不及。
設計圖片及對白
國際服務社做得計劃嘅代理機構，自然以為會以全包宴方式，即由幫長者報名申請，津貼到長者手後嘅後續工作。但有知情人士話，代理機構只係負責會見居於廣東因健康理由未能回港辦理申請手續嘅長者，以及進行個案覆核同處理查詢等，真係落手落腳幫長者報名申請並唔係佢哋嘅工作。據聞報名申請工作無啦啦要工聯會填補，底因係佢哋喺內地有經驗、有網絡幫助過長者，至今已處理約三、四千份申請，佔當局已處理嘅申請近三成。
事實上，工聯會做得服務本來就唔打算有乜着數，但工聯會中人就出聲呻話，如果工聯會係中標嘅代理機構，一切會係更加名正言順，依家反而白做無實質回報。
免費服務或感恩圖報
不過，呢位工聯會中人就計漏咗一啲無形嘅利益，只要諗吓點解咁多年來工記要喺內地設立諮詢服務中心提供免費服務，自然就會搵到答案喇！佢哋幫過內地啲港人長者，相信長者嘅香港家人會知道同記得嘅，必要時或會感恩圖報，所以何必咁短視呢？
