政壇：陳妙林踩單車由長春到港
呢排新股市場旺爆，半新股好容易畀人遺忘咗，如果個個好似開元產業投資信託老細咁有個人色彩，好可能幫到投資者記住佢哋喎。六十二歲嘅開元主席陳妙林係運動發燒友，尋日一身彩衣現身，原來啱啱用咗二十八日，由長春踩單車到嚟香港金紫荊廣場。
陳妙林用咗二十八日，由長春踩單車到香港。
陳妙林
呢位掌門人三個幾月前，帶領開元成功喺香港上市。佢做生意固然好有毅力，估唔到佢呢個年紀都咁勁，以頑強意志創下多個壯舉。今次佢連同其餘十一名來自開元單車隊嘅單車發燒友，長征五千里路，用咗二十八日由長春踩到嚟香港。無論係騎程里數或日數，都打破咗○八年北京、○九年台灣環島同川藏，以及一一年法國咁多次騎行以來嘅紀錄。
佢係今次單車之旅年紀最大嘅成員，但陳總平日訓練有素，做開大量運動，朝朝返工前會踩單車游早水，放工仲跑埋步，兼有連續多年嘅冬泳習慣，所以即使騎行途中遇到颱風菲特，都無礙壯舉。連新加入公司嘅行政總裁張一鳴都忍唔住開口盛讚陳總唔煙唔酒，係佢見過咁多民企老闆之中最踏實嘅。
