政壇：傾温和方案真普聯罵戰
公文袋立法會議員湯家驊前日以個人身份召開記者會，拋出特首普選溫和方案，包括沿用過往選委會嘅四大界別，再加入三百多名民選區議員組成提名委員會，並將公司票轉做個人票，以大幅提高提委會嘅選民基礎。
真普選聯盟尋晚喺例會上討論過湯家驊方案，雖然召集人鄭宇碩例牌話各黨喺討論時心平氣和，但據了解會上火花四濺，白鴿黨、工黨同人民力量相繼質疑湯家驊方案未包含「公民提名」元素，大家你一句我一句，並非如鄭宇碩口中所講咁「心平氣和」。
首先湯家驊喺介紹方案時略帶斥責語氣，質疑泛民依家只係企喺道德高地堅持公民提名，但其實大家都預咗中央最終唔會接納佢哋提出嘅意見，最後公民提名都係唔能夠成事。人力同工黨就堅持真普聯最終出嚟嘅方案一定要有公民提名元素，但白鴿黨就淨係話任何人拋任何方案都可以接受，隨即畀湯家驊反駁：「你哋可唔可以誠實啲？」
