政壇：卿姐話「凍」冇着吊帶裙
仲記得議員劉慧卿上周三喺立法會許下豪言壯語，話尋日會着番當年做記者時着過嘅吊帶裙返立會畀大家欣賞。不過，正當大家萬眾期待卿姐出場時，佢竟然着咗件黑色喱士樽領連身裙，再加鮮黃色外套現身，搞到大家都有啲失望，學佢話齋：「主席，好離譜囉！」
劉慧卿承諾會着嘅吊帶裙，點知尋日變咗件黑色喱士樽領連身裙。
我哋追問卿姐何解「彈票」唔肯兌現承諾，佢只係用一個「凍」字嚟回應，但尋日下晝最低氣溫都有二十八度喎。雖然佢無順應民意着吊帶裙返立會開會，但佢條連身裙都有喱士透視成分，佢話向來鍾意喱士，屋企衣櫃入面有幾件喱士衫，但平日冇乜機會着，今次着出嚟可能當畀住啲「利息」大家。
咁幾時先肯着條吊帶裙現身？佢就話要先諮詢黨內意見，大笑三聲後更加一支箭咁走咗去。睇嚟大家要見到卿姐着吊帶裙，要好似落實普選咁循序漸進，再等吓啦！
