被嘲為「吳得掂」嘅教育局局長吳克儉，早前喺北區幼稚園搶入學申請表風波中辦事不力，令佢已所餘無幾嘅民望，喺最新民調大跌排尾二。尋日佢赤膊上陣到立法會大會，回應末代高考生有好成績但冇書讀嘅爭議，佢不但無意出手相助，仲大講風涼話，建議手持幾條Ａ嘅高考生轉讀副學士，成績好話唔定可以繼續大學嘅夢想咁話。咁吳得掂民望排尾二又使唔使「燉冬菇」做住副局長先呢？

設計圖片及對白

話說教育局由高級程度會考（高考）轉制至中學文憑試（DSE）時，冇盡責任協調各大院校制訂同過往收生分數相若標準嘅準則，令佢哋成績就算高於所報學科嘅最低要求，都未能獲院校取錄。啱啱參加末代高考嘅五千三百多名自修生，只得三百一十九人成功入讀大學，相較DSE考生以聯招方法入學，入讀大學機會有成四分之一，易過非聯招嘅自修生好多。提出口頭質詢嘅勞工界議員郭偉強就要求吳得掂幫幫手。

教育界葉建源引用案例，指有末代高考生手持兩、三條Ａ都冇大學取錄，變相浪費人才，影響香港長遠競爭力。議員何秀蘭亦指呢班末代高考生成為新舊學制交替嘅犧牲品，要求教育局幫佢哋向院校爭取面試機會。梁家傑更要求吳得掂以局長身份，建議院校今年先取錄學生，畀佢哋明年入學。

當年會考「九條尾」

不過，吳得掂強調院校收生係「擇優而取」，主要會考慮申請人嘅公開試成績、面試表現同報考學系嘅相關程度等，教育局尊重院校收生自由，唔會亦唔應該干預，仲反建議學生可以先入讀副學士，成績好嘅話仍然可以繼續入大學嘅夢想喎！

聽講吳得掂當年會考都係「九條尾」，即係九科Ｃ級或以上，根據佢嘅準則，唔知要佢當年先讀副學士再博入大學，佢又制唔制呢？

第一手消息請下載on.cc東方互動iPhone/iPad/Android/Windows Phone Apps