檸檬太貴食唔起 百物騰貴師奶愁
男士們約夢中女神撐枱腳，最怕就係食檸檬，尤其如果閣下唔係腰纏萬貫嘅金融才俊，只係腰圍臃腫嘅金融「財盡」，嗰份被拒於千里之外嘅酸溜溜感覺實在係幾難啃嘅。之不過咁，難啃還難啃，各位好逑君子如果想請意中人食飯，宜早不宜遲嘞，事關檸檬大加價，遲啲就算想食都可能冇機會吖！
檸檬貴成點呢？犀利咯，由於美國寒冷天氣影響檸檬收成，佔本地市場約七成嘅新奇士檸檬來貨量大跌九成，市面零售由以往十蚊五個，減至十蚊三個，即係變相加價六成半，問你點頂。你知啦，檸檬係飲食業主要食材，漲價勢必推高營運成本，小本經營嘅食肆老闆百上加斤，個心仲酸過啲檸檬呀，陰功。
更辛酸嘅係，依家起勢加價嘅唔止檸檬，仲有其他副食品。有茶餐廳負責人呻苦，近期醬料、凍肉、罐頭、蔬菜樣樣加價，來貨漲價達百分之五至十，搞到生意難做，慘淡經營，無奈之下惟有以加價救亡。你話嘞，食材漲價，市民受害，咁搞法，莫講話請女仔去酒店擦餐勁嘅，就算踎茶餐廳都隨時負擔唔起啦，唔通香港男士真係命苦到要約女仔出嚟食西北風？
唉，百物騰貴，柴米油鹽樣樣加價，叫苦連天嘅何止青年人同食肆老闆。正所謂，巧婦難為無米炊，食材加風四起，最頭痛嘅係照顧一日三餐嘅家庭「煮」婦。嗱，檸檬漲價，最多飲少兩杯檸茶啫，但係雞蛋總唔能夠唔食啩。本報早前報道，內地雞蛋短缺牽連本港雞蛋入口價急升，單單過去一個月已漲價兩成半，而且隨住冬季雞隻產蛋量下降，蛋價仲分分鐘會再飆升添。香港民生日艱，萬一惡化為巧婦難為無蛋炊，官老爺嗰張「福為民開」成績單等捧蛋啦，叮！
所以話，今時今日，香港人真係民以食為憂o架。一方面當局把關不力，食物安全問題叢生令人提心吊膽，二來咯喎，食材起勢加價，實在唔到人唔憂心囉。而最令人無奈嘅係，百物騰貴，民生維艱，本地政客居然不食人間煙火，好似一味政治鬥爭搞佔領就有飯食咁。講句難聽啲，市民有班咁嘅「民意代表」，想有啖好食都難啦。
一句講晒，檸檬太貴食唔起，民心酸楚有誰問。既然搞事政客無能官僚不務正業，大家不如大破慳囊齊齊請佢哋食檸檬啦，叮！
