城中鏡：周浩鼎搞區報 街坊受落
雖然Holden周浩鼎只係離島區委任議員，但最近自資兩萬元印咗三千份東涌地區報，專講區內民生議題，例如的士站興建進度等等。Holden尋日喺區內派發，短短一個上午已派咗一千份，證明街坊幾受落。
周浩鼎（右）尋日喺區內派發東涌地區報，街坊反應唔錯。
呢份地區報每期印三千份，每兩個月一期，主打東涌區內民生事務，最新一期講東涌北新增的士站嘅位置，啱晒區內人口味。每期都要畀兩萬蚊，雖然話多唔多，但Holden背後有所屬政黨大條水喉，點解唔問黨拎錢呢？原來佢希望自由度大啲，自己科水可以加啲自己鍾意嘅元素，唔使驚拖累黨。例如今期佢就自爆由基督徒轉為天主教徒嘅過程。
