城中鏡：蔡李惠莉 幼園低調探孫
依家社會物質豐富，父母愛錫仔女，好易造就「港孩」，更何況小朋友讀緊嗰間幼稚園係外公外婆開嘅？「玩具大王」蔡志明嘅太太蔡李惠莉開幼稚園，細孫仔Amazon喺嗰度讀緊兩歲班，但蔡太話佢對所有學生都一視同仁，探孫嗰陣仲要好避忌盡量唔畀個孫見到佢，同老公喺門口偷偷哋裝吓就行開。
蔡李惠莉（左）同方劉小梅下月分別榮升奶奶及外母，一見面即互相恭賀。
曾偉雄（右）話自己個樣殘，所以顯得太太（左）年輕喎，大家又點睇呢？
身兼保良局副主席嘅蔡太尋日出席沙田馬場保良局盃，遇到老友鬼鬼嘅前總理方劉小梅，即不停咬耳仔，原來方太下月初嫁女，咁啱蔡太同月娶新抱，大家互相祝賀一番。傳統話兩件喜事不宜相沖，但身為虔誠基督徒嘅方太話一於冇有怕，照去飲蔡太嗰餐。
曾偉雄太座駐顏有「夫」
警務處處長曾偉雄夫婦都有入場，記者問曾太有乜駐顏秘方，曾太笑謂：「個髮型呃到人啫！佢（指老公）畀好多嘢我食。」曾偉雄就自認唔襟老，話：「同身邊嗰個對比之下，咪顯得佢年輕囉！」真係幽默。
