鍾國斌（左一）係立法會飛魚，圖中右起吳亮星、馬逢國、胡志偉同梁繼昌。
尋日係第三屆維港渡海泳，唔少政界名人都有報名參加不限時嘅優悠組賽事，志在落水一試身手，包括五位立法會議員同政制及內地事務局政治助理Ronald陳岳鵬。Ronald就話游得非常輕鬆，諗住喺政府搞個正能量組參賽。
咪睇佢哋腳揈揈，其實係等緊落水。
鍾國斌（箭嘴示）唔使三十八分鐘就游畢全程。
陳岳鵬（右）打算組成正能量組再次參賽。
紡織及製衣業界Felix鍾國斌就做咗「立法會飛魚」，以不足三十八分鐘游畢全程，比第二位嘅會計界Kenneth梁繼昌快兩分鐘有多。
體文界馬逢國原本報名參加優悠組賽事，但佢淨係游咗三百幾米就「上水」宣布投降，同金融界議員吳亮星雙雙乘坐大會船隻返回終點。馬逢國解釋自己起步時唔識得「執生」，淨係識得貼住其他泳手一齊游，點知游咗幾下就畀人打中佢左邊膊頭，搞到成隻左手都出唔到力，於是決定放棄唔再游落去。
議員胡志偉早前因過唔到大會安排嘅試水，尋日最多只准游三百米，點知佢竟然「偷雞」唔聽大會工作人員指示上水結束賽事，一條氣游到尾，好彩最後無驚無險游到終點。
第一手消息請下載on.cc東方互動
