真爆頭，大學洋校長櫈都未坐定，就被學術水準低過佢嘅小伙記話佢毫無做大學校長嘅經驗。喂！呢個鬼頭假假地都係英國布里斯托大學醫學及牙科學院院長呀！「未做過」就唔做得？呢啲咁小學雞嘅話，竟出自港大嘅教授級人馬，真丟臉！按佢哋嘅邏輯，咁，曾蔭權又點配做特首？

經常跑上大陸開工嘅港大醫學院外科學系系主任盧寵茂醫生怒斥洋校長無知、無能又無心，話佢唔識中文同普通話，以後點同「大陸各界」溝通？

連愛烏干達都係罪，抦佢不會為港大放眼世界。鬼佬校長直認唔識中文，及以曾在烏干達服務為傲。佢顯示的，是誠實，不說謊話，人格有保證。

喂！盧醫生，明顯地，你砌的，不是新校長，而另有所指，因為，選中佢入局的，係香港大學校務委員會的決定，鬼佬只是「求職者」一名，而申請表格又無註明要識「普通話」；另外，佢係做校長啫，又唔係做PR，有乜「溝通」，大可以在「陽光底下」，透過精銳的翻譯人員傳話便是。

至於，話佢唔熟香港事務，我哋亦不見得前任嘅徐立之好得去邊喎！若佢知碇，懂得香港人感受的話，就不會有8．18北大人出巡的鬧劇發生啦！

家陣，香港區的大學校長，主責係乜呢？講普通話？劈酒溝通？交際籌款？勾連大陸搞跨區聯校？呢件鬼佬一定唔掂，但選佢的校委會主席梁智鴻在記者會處喜孜孜的說，整個校委會同佢會「督促」和「囑咐」佢做嘢㗎嘞！大家放心吧！

風暴只是剛剛形成而已！有嘢睇！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps