SUN搞作：少膽虫手記：比《遜報》還遜
《遜報》鬧爆「無賤」台嘅文章被新腦腫抽起，最近有人玩集體劈炮，淫賤黎聽到好鬼開心，同少膽虫講：「前嗰排咪同你話啞視係朋友嘅，咁『無賤』就係敵人啦，依家《遜報》嗰個咩『遊樂園』鬧佢，咪係敵人嘅敵人，即係朋友囉！同我搵佢過嚟！」
「遊……遊樂園？！」少膽虫感覺坐緊張櫈搖搖欲墜，「腦細搵佢過嚟想做咩呢？洗廁所定係保安？」「可唔可以醒少少呀？」淫賤黎一巴打過嚟：「遊生咁鍾意做鍵盤戰士，我要搞番個新嘅政治新聞版面同fb，否則唔係點同正義傳媒嘅SUN搞作鬥呀？」
少膽虫終於認識到自己嘅愚昧，知道世界大勢唔容許再停喺紙媒，更何況我哋係壹淫媒，遲早同鹹書《蛇貓狗》一樣要消亡。為咗自己前途，決定絕地大反擊：「腦細！少膽虫識佢，等少膽虫嚟幫你牽線！」淫賤黎於是首肯。
「喂，遊生呀，少膽虫呀！」少膽虫沙膽咁打過去。「少膽虫？邊個嚟，我好似唔識你。」遊生冷然道。「哎呀，乜咁生外呀？你梗係唔識我啦，得我識你咋嘛！」「你究竟想點？」「無，我腦細想請你過檔《爛果》……嘟……」少膽虫聽到收線聲，成個人安樂晒。鬼咩，遜過《遜報》嘅報紙，邊個會同少膽虫爭住等退休？
