政壇：搞搞政：遴選港大校長金刀梁認漏招
國際醫學界中唔算太出名嘅馬斐森，最終喺爭議聲中出任香港大學校長，係近幾十年嚟港大首位非華人校長，但馬斐森被批唔熟中國國情同唔識中文，令身為校長遴選委員會主席「金刀梁」梁智鴻都周身中箭。金刀梁承認遴選委員會深思熟慮定出五大遴選準則，偏偏漏咗加熟悉亞洲同識中文呢兩大元素。
設計圖片及對白
八一八事件後不久，現任校長徐立之就宣布唔續約，港大於是成立校長遴選委員會物色校長。金刀梁尋日大談過去兩年到底做咗乜。佢話委員會未開會前，已向學生、校方同校友收集意見，之後遴選委員會經過五次大會，最終敲定五大準則，包括學術根基及領導才能、個人品格及誠信、對港大未來方向有遠見、豐富管理經驗及有良好人際關係。
金刀梁話跟住已開始全球招聘搵人，開頭收到五百幾封求職信，經獵頭公司同委員會篩選後，到尾段仲剩番幾十位「生還者」，然後委員會逐一面試，仲試過越洋同申請者面試，最終篩剩馬斐森一人，所以建議佢出任校長。
徐立之好有國際學術地位，但未能跨過政治關。再揀校長，港大點解唔將熟悉亞洲同識中文放入篩選準則呢？金刀梁承認當初定出五大條件時，的確係漏咗呢個方向，但佢堅稱港大作為國際級大學，無理由因某啲條件而限制人才喎！
