立法會秘書處喺每次開會後，都會製作會議紀錄同會議逐字紀錄，但如果市民想搜尋某一特定議題，就要逐個逐個會議紀錄慢慢睇，相當費時失事。有見及此，立會秘書長Kenneth陳維安尋日就喺社交網站上載一個輕鬆睇立會會議紀錄方法，就係利用網上搜尋器及資訊演示軟件，用生動方式演繹一堆沉悶嘅開會文字。
立會嘅官方網頁有個大寶藏，裏面有立會以至前立法局嘅會議逐字紀錄，最早去到十九世紀嘅一八五八年，但立會一直無高調推介。Kenneth尋日除咗宣傳立法會網站有呢項功能外，仲順手推介一個名為Capitol Words嘅美國網站，入面詳細教大家點樣用搜尋器同數據演示技術嚟分析國會嘅會議紀錄。
其實唔需要特別技術，喺立會官方網站直接瀏覽有關內容都好簡單。喺網上睇番一啲敏感年份嘅會議紀錄，例如一九六七年或者一九九七年，裏面嘅內容，放眼都係香港大時代嘅歷史。
第一手消息請下載on.cc東方互動
