政壇：貨櫃議辦政府零支援
早前講過元朗天盛選區出現咗全港首個「貨櫃式」議員辦事處，點知原來首個貨櫃議辦本來應該出現喺東區嘅，皆因東區區議員何毅淦早於今年八月已喺杏花邨附近落成貨櫃議辦，可惜因種種原因而延誤，失去咗擁有全港首個貨櫃議辦嘅榮譽喇。搞成咁，同民政事務局局長曾德成不無關係。
設計圖片及對白
話說何毅淦當選杏花邨選區議員後，到處物色開設議辦嘅地方，區內港鐵旗下嘅商場同街市舖位、非牟利機構場地等，但統統被拒絕，所以佢喺上年年中決定喺區外嘅工廈開議辦。由於地點偏遠，惟有每日開壇幾小時設街站，以應居民訴求。長遠計都唔係辦法，好彩政府今年終於引入貨櫃辦事處。原本一個貨櫃都唔係好貴嘅，但奈何區議會規定，議員唔可以買辦事處，只可以租，所以佢淨係租用呢個貨櫃連政府地租，每個月就要畀五千幾蚊。
區議員鬧爆
何毅淦應查詢時話，要維護居民私隱始終有辦事處比企街好。佢嘅貨櫃議辦本來喺今年八月中經已落成，最遲十月初開始運作，但為解決電力供應問題，除花時間駁電，仲要自費幾萬蚊訂造符合電力公司要求嘅電箱同電錶。電力裝置搞掂後，就輪到辦事處內部裝置，包括電話線路、影印機、傳真機等設備。但無地址又點申請電話線呢？故此佢就按差餉物業估價署要求，傳電郵予當局，點知一拖就拖咗兩個月。最近佢向該署查詢，先發現人哋唔見咗佢封電郵，所以呢個貨櫃到依家，仍然只係一個貨櫃囉！仲可能要到十一月先正式開張。
何毅淦大呻話，政府設區議員呢個職務就係為幫助佢哋了解地區問題同民情，點知一啲支援都唔畀議員。
佢又講得冇錯，既然當局畀得區議員搞貨櫃議辦，咁就應該幫佢哋排難解困，而唔係當聽唔到、睇唔到咁先得o架！德成局長收唔收到？
