欲助綜援就業 先解後顧之憂

呢，扶貧委員會通過為期三年獎勵綜援人士工作嘅試驗計劃，將受助人士非豁免收入部分儲起，當儲蓄金額累積到資產上限嘅兩倍，即可獲全數發還；如果到試驗計劃期屆滿時，累積金額相等或超過家庭資產限額一倍半，受助人亦可獲發放累計嘅獎勵金額。

簡單啲講，計劃嘅目的係針對現行綜援制度缺乏鼓勵就業誘因，受助人多勞不能多得，窒礙就業意欲等等問題，鼓勵佢哋搵收入更高嘅工作，自食其力，改善生活。社署估計，會有二千幾位失業綜援人士參與計劃。

社署過往推出過多種鼓勵綜援人士就業計劃，但效果都唔理想，最終成功就業及脫離綜援嘅只有百分之六點七咁大把，浪費咗唔少寶貴嘅社會同人力資源。新計劃能否達到預期效果，暫時無人能知，太一叮知道嘅係，綜援人士搵工，經濟誘因只係其中一個考慮，如果唔幫佢哋解決實際問題，計劃隨時可能重蹈覆轍，最後不了了之。

開講有話，有頭髮冇人想做瘌痢，基層市民只要力所能及搵到兩餐，都唔願意攞綜援，低收入家庭冇攞綜援嘅大有人在。香港人係有骨氣嘅，濫用社會福利資源呃綜援唔係主流，綜援「養懶人」嘅講法，只能反映現行綜援制度嘅弊病。

查實，好多人領取綜援係迫不得已。生活指數年年上升，但打工仔人工就歲歲原地踏步，話就話有最低工資，但在職貧窮情況近年並無大改善。如果胼手胝足嘅收入無法換來溫飽，攞綜援都係迫於無奈嘅咋。

仲有吖，唔少低收入家庭根本冇能力請家傭，如果子女年幼，屋企又冇長者可以幫手，真係踢晒腳o架。有託兒服務梗係好啦，弊在政府提供嘅幼兒服務唔止學額有限，申請亦困難；而私家託管服務收費又貴，留低未成年子女喺屋企又犯法，惟有辭工自己湊小朋友。少咗份收入，屋企財政即時出現問題，尤其係單親家庭或者家中仲有老人家需要照顧，咁就更加攞命，冇綜援試問點頂？

所以話啫，如果綜援真係「養懶人」，都係因為政府扶貧力度不足，綜援政策脫離現實，幫唔到真正有需要嘅人。太一叮都係嗰句，扶助弱勢社群，政府責無旁貸，幫助綜援人士重投就業市場，首先要做好配套措施，為佢哋免除後顧之憂。鼓勵受助人自食其力，唔等於推卸責任等佢哋自生自滅吖，叮！