笑到你驚

絕代雙貪一齊坐富商「施捨」畀佢哋嘅直升機睇風景，或者因為作惡太多，雙貪突然假仁假義咁話要做善事，貪曾話，「我哋喺高空度飛擲一百張十蚊紙，再叫淫黎派少膽虫嚟影相，咁就可以改善形象喇！」貪湯fing晒頭，一臉不屑咁話：「唓！你咁死蠢o架，我哋儲埋咁多鮑魚菜心肥雞，一於拎啲頭頭尾尾出嚟包到成份禮物咁，喺敍利亞空投，call晒BBC、New York Times採訪我哋援助災民，咁咪一蚊都唔使出就做英雄囉！」兩人大笑不止。機師Sam哥似乎頂雙貪唔順，不禁喃喃自語：「兩條廢柴丟自己落去，即刻全地球人都開心晒呀！」

嚇到你笑

或者因為太多「活化」，太多個人遊，每日全港都逼爆。有日下晝，中環有架巴士好爆，乘客成堆簷蛇咁貼住車窗，頃刻一道陰風吹來，全車人腳底發涼。司機不以為然，踩盡油門全速前進，去到馬路，竟然有個黑影閃出！司機手一鬆，煞唔切車，碌咗過去！一聲「砰」後，一個阿叔趴咗喺地下度，鮮血淋漓，身旁一堆腸跌晒出嚟！乘客有的作嘔、有的鬧爆司機殺人，而司機成個人呆咗。幾秒之後，怪事發生嘞……

但見阿叔顫顫抖抖企起身，形容猥瑣、笑容惡俗，乘客望之面色大變，阿叔徐徐執起地下啲腸放入口食，仲自言自語：「呢隻西班牙鮮味腸係內地高官送畀我貪曾o架！食得唔好嘥呀！」

第一手消息請下載on.cc東方互動iPhone/iPad/Android/Windows Phone Apps