政壇：搞搞政：公僕加薪風波 陳嘉信火上添油
今年公務員加薪引發工會同政府對撼，雖然已事隔幾個月，本地最大嘅公務員團體華員會仍咬住唔放，新一期華員報透露，特首私人秘書陳嘉信早前覆函解答佢哋嘅關注，但封信就好似點火咁，畀華員會好唔客氣咁還擊，不點名鬧呢封信同公務員事務局局長嘅行貨回應異曲同工，又警告本港社會正係多事之秋，政府應該求同公務員團體同心同德，若然唔係，管治只會更困難！
設計圖片及對白
睇番陳嘉信封信，佢基本上全盤引述公務員事務局嘅立場，又將焦點拖到二○一四年嘅薪酬調查機制，當二○一三年嘅糾紛冇到，咁樣明顯迴避華員會嘅提問，難怪被批評係「翻版」兼不對題喇！
其實華員會發惡已非第一次，但今次佢哋嘅措詞就明顯火氣極盛，公務員團體同政府本來係利益共同體，彼此休戚與共，華員會今次卻以社會多事作警告，畀人隔岸觀火、甚至踩多腳嘅威脅意味，有口痕友話，打工仔冇人唔希望加多啲薪，而加薪不符希望又係常見現象，本地打工仔大都試過，但有幾多人可以咁樣還擊僱主呢？
