政壇：競委會高薪聘揸fit人
立法會去年通過《競爭條例》，而競爭事務委員會（競委會）亦處早期籌組階段，正所謂「蛇無頭不行」，最近開始聘請包括行政總裁在內五名高層管理人員，聞說佢哋嘅薪酬最高上限可同首長級第八級（D8）相同，為二十二萬四千多元，下限係月薪近十四萬元嘅首長級第二級（D2），粗略估計呢五名高層管理人員年薪合共將近千萬元。
根據競委會最近刊登嘅招聘廣告，呢五名高層管理人員嘅入職要求，應具備競爭法或經濟學學歷或專業資格，需要至少十年獲得專業資格後有關工作經驗，相關招聘截止申請日期係下月十五日，目標係明年首季末或第二季初可以履新，其中行政總裁一職須由特首委任。至於競委會秘書處嘅辦公室，亦將於年底由舊政府總部遷至灣仔胡忠大廈。使咗咁多錢，相信市民都會好關注究竟呢個委員會係咪物有所值。
