政壇：國民黨內鬥燒到香港
台灣立法院院長王金平日前遭國民黨撤銷黨籍嘅政治風波，被視為國民黨馬、王兩派內鬥，估唔到香港亦有火頭。我哋收到消息，話國民黨港澳總支部嘅揸fit人，即中山學會主席陳之望上周三晚上，喺中環一間高級中菜酒家擺咗一圍，被懷疑借宴請來港出席台商協會中秋活動嘅僑務委員會委員長吳英毅為藉口，實情為陸續進行嘅挺王行動造勢。
據聞當晚獲邀請嘅十四人之中，九人係國民黨港澳支部常委，但由於部分人士識穿咗主辦人嘅用意，所以有兩人話有事未能出席，另外有三、四人更臨時「放飛機」缺席。有關人士仲估計，呢場王金平保衞戰未有咁快完結，而且力度仲好大，隨時燒到海外，例如香港及日本等地。
當晚我哋曾經去到酒家現場探看，真係見到陳之望本人。但問佢係咪借設宴嚟幫王金平復位呢？陳之望就即時否認，仲話自己身為基督徒可以將隻手放喺聖經上發誓，並無做任何挺王嘅事喎！
