薑愈老愈辣，鄉議局主席劉皇發就係一例，佢尋日同政務司司長林鄭月娥同場出席一個活動，致詞時話中有骨，話好多時政府嘅政策究竟係利民抑或係禍民，往往只差一線，如果推行不當，又或者不得其時嘅話，有時會好事變壞事，勞民傷財兼遺禍深遠喎！發叔溫和話語卻如刀鋒利，究竟係單打擴建堆填區、西灣村納入郊野公園範圍定係咩？只有佢先知，只係在場嘅林鄭就慘囉，雖然做到一派從容，但口啞啞當聽唔到嘅滋味真係唔好受o架！

設計圖片

面不改容 有傾有講

尋日下午立法會議員梁志祥喺朗屏嘅辦事處舉行開幕禮，發叔及建仔主席譚耀宗等都有出席，但過去好老友嘅發叔同林鄭開始時完全零交流。林鄭致詞時話，政府好多政策都要得到地區支持，例如堆填區問題，政府都要先同地區磋商。唔知係咪回應林鄭嘅話，發叔一上台就話好認同「民為國家根基」呢句話，政府施政必須要以民為本，當權決策者嘅一言一行，或輕或重，或緊或緩，足以影響政府政策可否順利執行。

佢跟住話「利民」抑或「禍民」只係一線之差，好多時政策推行不當，或者不得其時，就會將好事變成壞事，唔單止勞民傷財，仲會遺禍深遠，歷史有好多事例可以作為借鑑。至於城鄉關係，發叔就話大家生活方式同傳統習俗都唔同，希望政府各部門或各界議員都會加強了解呢啲問題，喺用心服務市民之餘，保護鄉郊地區發展喎。發叔當面出招，仲擺明針對自己嘅發言，台下嘅林鄭卻面不改容，致詞完畢後，大家仲喺台上有傾有講添！

呢兩個政壇高手搞到要借梁志祥議辦場地過招，可見政府政策觸動鄉村利益嘅問題已經白熱化！

第一手消息請下載on.cc東方互動iPhone/iPad/Android/Windows Phone Apps