貪曾離譜委醉貓掌廉署
前廉政專員湯顯明涉濫用公帑豪飲豪送兼外遊惹全民公憤，前廉政公署人員查錫我炮轟貪湯行事離譜、「出咗名」愛飲酒，質疑同因連串貪腐醜聞、正接受廉署調查的前特首曾蔭權爵士，當年仍一意孤行委派一名醉貓任廉政專員，「就係幫佢吼住個背脊」，「如果真係咁，曾蔭權先生真係好唔要得」，又重申湯顯明長時間且頻密違規，曾蔭權作為其上司，「唔知，你就係無能，知而唔去處理，就係縱容同包庇」，指廉政公署今日出現問題，「湯顯明第一個要負責，第二個要負責就係曾蔭權！」更認為曾蔭權應被譴責。
查錫我
貪曾（左）被指委任有醉貓之稱的貪湯任廉政專員，疑「為自己吼住背脊」。
「貪湯事件」將廉署金漆招牌打破。
曾任廉署執行處總調查主任的大律師查錫我昨出席電台節目時指，對湯顯明行為極之反感，指權力使人腐化，若問題出於一個部門的首長，「好攞命、好難搞」，而委任湯出任廉政專員的曾蔭權，同樣值得譴責：「其實大家都知，喺AO（政務官）入面、喺海關入面都出咗名，佢（湯）係鍾意飲酒......有個花名叫做醉貓o架喎，咁點解你（曾）要委派一個醉貓去做廉政專員？不禁令人哋有好多諗法！」
查錫我質疑表示：「坊間有個講法，曾蔭權本身都係貪小便宜，有冇大貪我唔知道，依家仲未完件案，起碼我哋睇到佢係貪小便宜，佢搵佢（湯）嚟就係幫佢吼住個背脊，如果真係咁嘅話，曾蔭權先生真係好唔要得！為咗個人利益去做呢啲嘢。」
查錫我：曾蔭權應被譴責
貪曾作為貪湯上司，查錫我質疑曾蔭權能力，認為曾蔭權無理由不知道湯顯明的行為，「要公平啲，如果偶一為之，一次嘅，你唔知唔出奇......但長時間、咁頻密發生嘅事情，你作為上司，你話唔知呢，你係無能，如果知，你唔去處理呢，就係縱容同埋包庇」，因此不論貪曾知與不知，「我認為曾蔭權應該被譴責嘅」！
貪曾及貪湯關係千絲萬縷可謂人盡皆知，貪湯一直被視為貪曾愛將，○九年屆六十歲退休之齡，理應退任廉政專員一職，不過仍獲貪曾秘密續約三年，令二人任期於去年六月三十日一同結束，被指是「明益自己友」。
電台聽眾評貪湯
黎女士：「湯顯明不單欠全香港市民一個道歉，更欠廉署、退休公務員一個道歉！ICAC個金漆招牌經營咗好多年，畀佢一次就破壞！湯顯明個聲明有潛台詞，就係廉署制度唔好，有漏洞、有灰色，佢就唔使道歉！」
黃女士：「只有湯顯明一個人係冇可能o架！佢下低、下屬成大班人都係同流合污o架！你下低啲人實知，點解唔報出嚟？我哋做會計，一年查得出嗰啲經理點樣穿櫃桶底、點樣將啲錢攞走，點會唔知呀？點會得一個人呀？」
