醫院開張冇人手 天殘地缺真搞笑

東涌居民望穿秋水嘅北大嶼山醫院本月廿四日正式啟用，不過咪開心住，話就話係「醫院」，查實叫「診所」更加貼切。點解會咁？事關唔夠醫護人手，首階段只提供有限度服務，急症室開朝九晚五，而且唔提供住院服務，問你服未！

救人如救火，分秒必爭，朝九晚五之外嘅求診個案點算？對唔住，咁就要委屈吓嘞，病人會被轉送到其他醫院，例如瑪嘉烈醫院喎。早排本報至踢爆東涌救護站白車嚴重不足，遠遠追唔上東涌地區嘅服務需求，家陣仲要轉送北大嶼山醫院病人，等於百上加斤，隨時延誤搶救，即係攞病人條命較飛啫。

院方話喎，期望明年一月將急症室服務擴展至每日十六小時，爭取明年第三季擴展至全日廿四小時。嗱嗱嗱，左一個「期望」，右一個「爭取」，即係未作實，斷估冇痛苦喇。咪畀太一叮講中吖，人手短缺問題未解決，呢張空頭支票分分鐘又係兌現唔到，隨時「彈票」o架咋。

講起真係搞笑，北大嶼山醫院好事多磨，一拖再拖，東涌居民望到頸都長，千呼萬喚終於等到醫院即將開張，點知硬件搞掂，軟件又跟唔上，尤其人手唔夠，搞到服務天殘地缺，唔湯唔水，正一冇又煩，有又煩，你話係咪嘥氣吖。

其實，前線醫護人手不足，已經成為公立醫院嘅「死症」。醫管局管理不善，管理層架構臃腫，肥上瘦下，佔用大量資源，搞到前線人員疲於奔命，做到有氣冇碇抖，好多人頂唔順而一走了之。呢，早排有護士組織調查發現，公立醫院近三成受訪護士計劃未來半年離職或退休，其中計劃劈炮嘅兒科護士高達五成，咪就係因為工作壓力太大囉。咁搞法，咪講話北大嶼山醫院服務天殘地缺，其他公立醫院亦隨時唱空城計都似。

講到底，資源錯配，人手不足，導致公共醫療服務質素每況愈下，最大受害者始終係市民。天水圍醫院講咗N咁多年，依家仲係無影無蹤；將軍澳醫院婦產科話設又唔設，市民只能夠繼續望天打卦。當局早排煞有介事成立督導委員會，話要檢討醫管局運作喎。不過，計太一叮話齋，旨意呢班港產官僚整頓醫管局，改善醫療服務，根本就係緣木求魚，大家不如求神拜佛自己唔好有病仲實際喇，叮！