呢位楊局長因手錶起禍被判刑，內地傳媒稱他為「表哥」，這「表哥」，並非親屬身份的「表兄」，而係內地用字，「手錶」作「手表」之故！

中國大陸無官不貪，已成常規，求其一個村長床下底，都有一千幾百萬現金，無的，不特只算是清廉，更會畀人調笑，兼係一樁荒誕事！早前，陝西安監局原局長楊達才被判巨額財產來源不明，坐牢十四年。佢都算黑仔，去年八月，佢去咗一宗釀成三十六人死亡嘅車禍現場視察，整天面帶微笑，被人攝入鏡頭，鋪上網狂抦，繼而揭發他在不同場合曾戴多款不同名牌手錶，遂遭審查。話佢當黑，因原來佢天生一副「含笑相」，天冧下來，佢也是「笑口常開」的！

當今香港報章，各自有特定的「字表」，有用「手錶」，亦有寫「手表」，究竟邊個啱呢？文字是分工的，也有生命的！好應跟時代潮流運行！中國古時沒有「手錶」，只「計時器」。器具上的線紋，是一面圖表，故當鐘錶由外國傳入時，便用「表」字名之！但一字多音多義的中國字，在此情況下，便出問題：「鑽石表面上有個表」，應如何理解呢？若用有「金」字部首區分的話，我們便可以清楚知道「鑽石錶面上有個錶」，或是「鑽石錶面上有個表（表格）」，又或「鑽石的表面上有錶/表」囉！「表哥」與「錶哥」，亦可一目了然！

大陸用語，除了因簡體字混亂外，每當有人出事後，總愛封之為「乜哥」「乜姐」。最出名者，當然係二○一○年喺寧波流浪行乞的型男「犀利哥」啦！香港亦唔弱，隨大陸化衝擊，暴現咗件「爆咪姐」，佢就係舊年幫梁振英競選特首的造勢大會上之女司儀，本性狂熱，在台上的叫喊尖聲刺耳，被媒體封為「爆咪姐」！

「表哥」又好！「錶哥」又好，同「爆咪姐」一樣以示權貴身邊的乜哥乜姐為榮，還不及一個行乞型男「犀利哥」咁得人愛戴和敬重！

第一手消息請下載on.cc東方互動iPhone/iPad/Android/Windows Phone Apps