「HKBC media」網台網站。
互聯網已成政界爭奪支持者、做宣傳嘅必爭之地，泛民主派過去喺網上工作做得好足，最近，政府同建制派都有意急起直追。中華總商會會董張俊勇（Thomas）最近都搞緊名為「HKBC media」嘅網台，佢話到明歡迎左中右不同政見人士參與，又否認高薪挖角前人網主持或員工加盟，期望新網台最快今年內設立時事台頻道，到時將邀請立法會議員出席節目。
張俊勇大搞網台，招攬左中右人士論政。
翻查呢個新網台網頁，部分節目主持的確有一定來頭，最為網民熟悉嘅係網上有一定知名度嘅阿靳，另一個較為人熟悉嘅面孔，就係早前因參加盛女真人騷節目彈出嘅Bonnie，第時究竟仲有無人氣主持加盟，呢個真係要拭目以待嘞。
此外，策發會秘書處尋日向立法會提交文件都披露，中策組早在前首席顧問劉兆佳（佳叔）嘅年代做嘅青年研究，由官方角度總結時下青年人，認為包括「八十後」嘅青年群對建制有較多批評，更信奉民主同更重視保育環境；善於使用互聯網，所以，當局喺制訂政策時應多啲利用互聯網等新媒體或網上平台接觸青年人，其實，呢啲可算老調重彈，亦可見政府真係咁多年都原地踏步。
第一手消息請下載on.cc東方互動
