政壇：陳年劇集預示龜苓膏風波
龜苓膏成分及質素問題喺港粵兩地掀起熱話，食衞部門嘅官員都圍住呢款傳統食品嘅監管氹氹轉，有心水清嘅網民就發現，龜苓膏嘅爭議原來早喺電視劇中出現過，唔知啲高官會唔會即刻睇吓，以便更好迎戰今次事件呢？
呢位心水清嘅網民記起早喺十幾年前本地一套熱播電視劇集《男親女愛》中嘅劇情，劇中飾演律師毛小慧嘅藝人鄭裕玲喺法庭上為咗幫賣龜苓膏嘅客戶辯護，歪理連篇話龜苓膏偏方流傳咗百幾年，原本的確係用金錢龜鮮製，但後來唔忍心殺龜，仲見到隻龜口含草藥，就靈機一觸用草藥製膏，但依然用「龜苓膏」呢個名。
點都好，呢個只係電視劇嘅戲劇表達方式，不過，今次大眾咁關注事件發展，有飲食業中人就話，恐怕啲火會燒向除龜苓膏以外嘅其他產品喎。
