政壇：羅啟妍 季玉年 借出珍藏助藝展
第一屆「都會文化十月」藝術節尋日舉行活動，新世界發展聯席總經理鄭志剛去中環藝穗會捧場，珠寶設計師羅啟妍、季豐軒畫廊董事總經理季玉年（Catherine）等都嚟支持。藝術節創辦人許劍龍話，藝術節想做到好似「法國五月」咁樣，透過一系列唔同形式嘅藝術活動，吸引年輕人探索本土文化，搵番身份認同感。
羅啟妍（右）借出至愛嘅宋朝瓷器予許劍龍喺藝術節展出。
季玉年戴住嘅古董耳環（小圖）夠晒獨特。
羅啟妍話自己已非珠寶界喇，而係歷史學者及家具收藏家，佢屋企有好多古代家具及瓷器，曾經連食飯嘅碗碟都係古董。佢笑稱，有次國際拍賣行高層到屋企作客，驚嘆問：「呢度係咪開封？」為咗支持藝術節，羅借出部分收藏參加展出，包括佢至愛嘅宋朝瓷器。佢話收藏宋瓷已近三十年，原本一直將呢啲古董當日常碗碟使用，但試過打爛咗，好心痛，依家已經唔捨得用。兩年前佢開始做仿製宋瓷，務求令呢個中國文化巔峰藝術得以傳承。
至於Catherine，今年亦攞出幾幅名畫展出，又向藝術節獻策，長年醉心藝術嘅Catherine多年來幫法國喺香港搞旺「法國五月」，因此更獲法國頒發國家榮譽騎士勳章。
