做咗「鍵盤戰士」嘅發展局局長陳茂波，日前喺網誌提出探討開發郊野公園用地，結果搞到一身蟻，而各界都對如何搵新地拋出好多建議。白鴿黨尋日都召開記者會獻計，主持記者會嘅該黨立法會議員胡志偉反建議政府，應該引用法例，以建設公共設施為名，收番新界閒置農地，仲搵四大地產商開刀，收番佢哋夾埋共九百七十公頃嘅農地。胡志偉呢次舉刀揮向嘅係地產商，但資本主義嘅香港可以咁隨便話收地、徵地嘅咩﹖白鴿黨呢一招真係狼過劏房波喎！

設計圖片及對白

胡志偉尋日話，全港有三千二百公頃農地，當中七成或以上係閒置或者用作非農業用途，而截至上年四大地產商合共佔有九百七十公頃農地。佢呢啲數據有冇根據都有待證實，但佢已經邁開下一步，指有部分發展商早喺八十年代中已經開始囤地，認為港府與其開山劈石搵地，或者盲目開發郊野公園，講緊都要一段長時間，倒不如探討吓點樣善用閒置農地。佢嘅建議係，政府可以引用《收回土地條例》收地，但要講明土地係用來做公共建設，好似公屋、居屋咁。

未考慮各方利益

白鴿黨明言，政府用呢條條例收地，都要支付九百多元一呎嘅賠償，唔會益地產商、又能好快搵到地。葵青區議員尹兆堅更講到明，如果政府唔規管囤地，公義上會有問題喎。

白鴿黨今次嘅「公義」建議聽落似是而非，但就擺明向地產商開刀。不過，佢哋似乎只係從等緊上樓嘅市民立場出發，冇諗過上市地產公司買地做土儲、以維持公司平穩發展嘅需要，如果政府真係好似白鴿黨咁講徵地，咁地產公司股民嘅權益又邊個去保護呢？有多少土地嘅小業主咪要驚定先？好心白鴿黨獻計都諗清諗楚啦！

第一手消息請下載on.cc東方互動iPhone/iPad/Android/Windows Phone Apps