SUN搞作：少膽虫手記：倫理委員會
「腦細，有人要挖你呀！」淫賤黎一聽少膽虫咁講，立即一手護眼，一手護股。「邊個咁大膽？呢啲咁喪盡天良嘅嘢都做得出，簡直就天無眼！」少膽虫當然唔會畀佢懶正義嘅表現呃到，好冷靜咁同佢講：「我係話嗰壹部爛電視，睇又無人睇，賣又賣唔出，債主要挖你私己錢出嚟，填咗條數佢。」
每當淫賤黎去到絕路，都一定會再獻新「淫」。淫賤黎蠱蠱惑惑咁話：「一早諗到點應付啦！你睇吓呢套日本愛情動作片先！」以任職壹淫霉經驗嚟講，少膽虫一見開頭有乜乜倫理委員會字樣，即時就話：「唔得啦，遮住晒，唔好睇嘅。」淫賤黎難得大讚：「識貨喎！你依家明白動身淫點解仲未突破到道德嘅底線啦！」少膽虫不解。
「死蠢！動身淫以後見到咩部位都唔准打格！要呈現最真實、最赤裸嘅全相畀讀者睇！」淫賤黎大聲責罵。「咁……咁我哋個倫理委員會唔畀點算好呢？佢哋睇實有無踩界喎！」少膽虫好擔心畀人告，坐穿牢底。
「好簡單，」淫賤黎奸笑一聲，「搵個乜倫都無嘅人入去做咪得囉！」佢笑望少膽虫。
