城中鏡：蕭嘉怡九磅B曝光
呢排政圈喜事多，中西區區議員蕭嘉怡前晚生咗個近九磅嘅BB女，各界紛紛送上祝賀。有人叫嘉怡快fa啲追多個，距離下屆區議會選舉仲有兩年，唔知佢會否認真考慮呢？
嘉怡尋日喺社交網站留言，自言「經過一場戰鬥，BB昨（前）晚出世見大家，接近九磅巨B，順產，生得好辛苦」，然後將九磅巨Ｂ女嘅廬山真面目曝光。由於嘉怡喺政圈人緣一向唔錯，短短時間已有好多人留言祝賀，其中其黨友、中西區區議會副主席陳學鋒留言叫佢「整多件」，換言之即係叫佢快啲追多個；元朗區議員陸頌雄則話「媽細Ｂ大，恭喜，小巨人與新媽媽」。
事實上，嘉怡呢個新任媽媽對愛情結晶來臨一早做足準備，之前就算工作幾忙都有抽時間執屋，希望留番多啲空間用作放置BB物品，呢個新任媽媽對巨Ｂ認真寵愛有加。
