城中鏡：高人提點博鰲上「鏡」
由香港菁英會搞嘅博鰲青年論壇（香港）將於下月九號喺會展開鑼，今屆聚焦「創意青年 創新亞洲：攜手共創美好未來」。身兼論壇籌委會主席嘅菁英會主席梁宏正尋日拉埋一眾菁英兄弟姊妹喺中環食晏，佢話齋度論壇Logo已絞盡腦汁，大家一度想用燈泡，寓意思維「叮」一聲開竅，點知燈泡喺內地人眼中係「傻仔」咁解，差啲搞出大笑話。佢又話幸得高人提點，最後決定用巨型放大鏡做Logo，醒目又搶眼！
菁英女將瞓身籌備論壇，何玉慧（左起）、趙慧怡、曾鳳珠、陳寧寧、莊家蕙同黃麗芳。
林榮鋒（左起）、甄韋喬、白富鴻、施榮忻同馮英倫，都希望繼續搞好博鰲論壇。
梁宏正為博鰲論壇度Logo，最後揀咗用放大鏡做標誌。
「鋼鐵公主」陳寧寧、莊士集團太子女莊家蕙同信和集團都全力贊助，出錢又出力；而菁英會常務主席盧金榮就擔任論壇總指揮。幾忙都好，大家不忘發短訊恭賀香港青聯主席霍啟剛添丁，稍後會約啟剛擦餐勁慶祝。
嘉賓陣容鼎盛
論壇嘅陣容可謂粒粒皆星，除咗靚仔影星張震、蘭桂坊之父盛智文、中國銀監會前主席劉明康，仲有故宮博物院院長單霽翔，組合多元化。
菁英會創會主席施榮忻話，希望創造一個思想碰撞平台，等一眾領袖同青年人可以互相切磋。但佢慨嘆上屆政府喺青年工作方面力度不足，即使唔少青年智囊積極提出具建設性意見，但都不獲重視，搞到青年問題積習太深，令今屆政府施政百上加斤喎！
