政壇：搞搞政：歷「劫」豪遊團 返港各自飛

話說棠哥太太喺下榻嘅酒店外候車，突然出現四名吉卜賽女子夾手夾腳明搶佢手袋，好彩棠嫂身手敏捷，加上酒店職員同團友及時幫手阻止，棠嫂先避過呢一「劫」。其後就輪到議員涂謹申、何俊仁喺地鐵車卡內被偷錢包；鍾國斌嘅太太又見到有人成隻手伸咗入佢手袋；馬逢國就喺地鐵站內被人索簽名及摸屁股。大家咪以為馬逢國特別威水，因為喺當地咁攞簽名嘅人原來係騙徒，遊客簽咗名，佢哋就會話簽咗約要捐款。至於被摸屁股，其實只係想偷佢銀包啫！

因為呢啲遭遇，佢哋齊心一致，無再分泛民同建制，睇緊彼此財物，先至逃過損失。但佢哋返港後因接受款待被質疑，於是由團結變成各家自掃門前雪，更變得針鋒相對，人性莫過於此。