特首CY梁振英今日結束為期十一日休假復工。究竟佢喺休假期間去咗邊度?早前有傳佢去咗內地東北一帶休息,但冇圖冇真相,講乜都嘥氣。有一眼關七嘅網民就轉發咗微博訊息,爆料話CY同家人曾到遼寧千山風景區遊覽,唔知CY遠離煩囂充完電後,政府施政管治方面會否有一番新氣象呢?

網民揭行蹤

政府一貫做法係唔會透露政府主要官員休假嘅目的地,但喺呢個資訊發達嘅年代,亦難逃網民嘅追蹤。有網民最近喺網上討論區報料,話CY喺休假期間曾到千山風景區遊覽,其中遊覽大佛景區時,據講CY被「大佛寺」三個字吸引,原來呢三個字係香港西方寺主持親筆題字,CY都大讚千山有神韻,而且係靈秀之地。

不過,再細心留意網民轉發嘅微博訊息同圖片,原來CY呢次行程非單獨行事,而係全家總動員出遊,太太唐青儀、三名子女傳昕、齊昕同頌昕都有同行,似乎一向重視家庭觀念嘅CY,一早已計劃利用呢個難得嘅假期同家人共享天倫樂。

第一手消息請下載on.cc東方互動iPhone/iPad/Android/Windows Phone Apps