政壇：醫管局掌櫃學做真女人
好多人都覺得女性精打細算，搵佢哋管住盤數最放心，原來成立二十二年嘅醫院管理局都係由「女掌櫃」掌握財政大權，佢就係財務總監Nancy謝秀玲。Nancy係開局元老，一直服務至今，但相聚有時、離別有時，佢下月就會退休，結束管數生涯。
Nancy話退休後要學做真女人。
Nancy尋日同傳媒告別，並分享多年管數生涯，最難忘要數○二年醫管局削減開支同埋今年財政預算案「被拉布」，搞到成班同事差啲無糧出。大拿拿二十八億元，佢話嗰段時間都幾驚險，日日都諗Plan B應變，二十年以來首次打畀銀行借錢出糧，仲叫人畀最低息，又試過搵藥廠幫手，通融遲啲找數，呢個掌櫃仲提醒繼任人要有多啲儲備以防萬一。
但計數機好掂嘅Nancy竟被吸塵機考起，話款式同功能多多，都唔知買邊部好，大嘆女人唔易做，所以退休後要學吓做真女人喎！
