政壇：甘威玩低調惹揣測
正當各政黨都為二○一五年區議會選舉作部署、啟動選舉機器之際，偏偏曾叱咤中西區嘅區議員「甘威」甘乃威就放軟手腳，近月愈做愈低調，政圈仲傳出佢有不可告人嘅原因，所以想放棄連任區議會。呢個消息傳開後，唔少建制派都對佢個議席虎視眈眈。
設計圖片
甘威喺○八年先當選立法會議員，但憑雷曼事件一役令佢贏得唔少掌聲，舊年突然唔競逐立會連任，政圈已傳言四起，覺得以佢好勝嘅性格無理由唔同黨友爭出選。有地區人士話，以前甘威喺中西區區議會好勇猛，政府一做漏少少工作，佢即刻咬住唔放，做事非常落力，講勤力佢認第一，無人敢認第二，唔少官員都買佢怕。但自從舊年佢棄選立會後，就一直玩低調。
突然隱形唔落區
據聞甘威依家嘅區議會會議出席率依然好高，反而議會外嘅工作同曝光就停頓晒，既無參加示威遊行，連區內嘅爭議性議題，佢都唔多出聲，寧願留畀其他後輩發炮，同隱形無乜分別。有中西區議員話，其他白鴿黨新人都會落吓區，但就唔係好見甘威落自己選區，同佢以前作風大有不同。
其實甘威正值壯年，又喺上環打滾十幾二十年，吸票實力不容忽視，所以佢突然低調，難免惹人揣測。政圈中人話甘威嘅「求愛不遂」風波都已成過去，除非有其他把柄或黑材料畀人揸手，否則估唔到有乜理由要咁低調，甚至疑似裸退。另外一個講法就話甘威因身體問題而退下火線，到底邊個版本先係真，真係無人知。我哋亦打過幾次電話畀甘威，但都無人聽，令傳聞更添疑團。
