消防防民之口 家醜愈冚愈醜
防民之口，甚於防川，箝制輿論係專制暴君所為，從來冇好結果。唔知點解，香港消防官僚冇吸取歷史教訓，最鍾意與民為敵，一時以莫須有罪名滋擾傳媒打壓新聞自由，一時又禁止前線員工爆料打壓言論自由。太一叮思疑，消防處長期不務正業，變成肩負政治任務嘅現代東廠，全稱已經改作「消滅批評意見防民之口處」。
呢，消滅批評意見防民之口處又製造白色恐怖喇。該處高層最近失驚無神發出便箋，「提醒」消防員使用WhatsApp等社交應用程式群組及互聯網媒體時，無論當值或休班，必須維持部門「正面專業」嘅偉大形象，若有人刻意發放或披露對部門有負面影響或損害部門聲譽嘅訊息，又或者發放對任何人士不善意批評嘅訊息，會被紀律處分。
叮佢個鎯鎯吖，堂堂執法部門自欺欺人，用接近恐嚇嘅手法強迫員工封口，唔止打壓言論自由，而且涉嫌侵犯私隱，難怪引起前線員工極大不滿。最諷刺嘅係，呢項冚家醜嘅措施弄巧反拙，搞到愈冚愈醜，規管員工使用WhatsApp嘅便箋內容透過WhatsApp瘋狂傳播，傳傳下居然連記者都收到，你都咪話唔搞笑！
嗱，有前線消防員就講得啱嘞：「我哋都想讚吓消防處啲好嘢，但你有好嘢先得o架！你冚住唔畀同事講啲衰嘢，啲衰嘢都係未解決！」正所謂，身正不怕影子歪，如果消防處本身冇問題，根本唔使怕人批評。反過來講，消防處管理一塌糊塗，大花筒買錯裝備有之，通訊系統頻頻跪低有之，消防局內花天酒地有之，甚至連消防宿舍唔守消防法例都有之，亂象多到數唔完，無論點樣臭屎密冚，啲臭味都會傳出來o架。
更何況，家陣互聯網盛行，傳播媒介多元化，資訊無遠弗屆，內地民眾都識得用網絡平台維權揭發貪官啦，消防處官僚企圖用一紙便箋封住悠悠眾口，同螳臂當車有咩分別呢？人在做，天在看，消防處中區滅火輪碼頭早前出現萬魚跳上岸嘅奇景，總部大樓又無緣無故起火，有人話係天意示警，唔係冇道理o架！
消防處處長陳楚鑫，知唔知咩叫基本人權呀？知唔知咩叫言論及新聞自由不容侵犯呀？唔識嘅話，等太一叮話你知，「防民之口」嘅故事主角叫做周厲王，結局就係全國人民忍無可忍，群情洶湧，爆發起義，殺入王宮，厲王淪為喪家之犬。如果閣下繼續執迷不悟，唔識以史為鑑，下場睇怕唔好過周厲王好多o架咋，叮！
