SUN搞作：少膽虫手記：壹全霉大抄家
文憑試爆集體抄襲醜聞，涉事班學生被取消資格，其實同Peter一樣，少膽虫都巧京京。皆因壹全霉竊相抄新聞當飯食，你話有咩辦法唔驚有朝一日畀人取消腦腫嘅資格呢？一講曹操曹操就到，淫賤黎喺房度又大嗌：「少膽虫！你識唔識字o架？」
出咗名文盲嘅淫賤黎捉錯字，真係嚇親少膽虫。少膽虫仆入房，只見淫賤黎一邊食緊刺身，一邊用油淋淋嘅嘴，向住份《爛果》正要咀落去。「喂！少膽虫你寫埋咁多嘢，寫乜春夏秋冬呀？睇唔明嘅？搞到我仲想唇讀睇吓添，你快啲解釋！」淫賤黎突然停住咁講。少膽虫即刻哈腰點頭：「腦細！我哋關顧傷健人士，轉咗做失明人市場呀！」淫賤黎大喜：「醒喎！點解以前無人諗過嘅？不過點解無凸字嘅？」少膽虫急中生智，兜番話：「咩呀，少膽虫手記嘅Logo咪係個『凸』字囉。」淫賤黎恍然大悟：「係啵係啵！失明嘅都睇《爛果》，今次仲唔發達？咁以後員工做Gym，恩准有番條毛巾用啦！」少膽虫暗嘆，呢個腦細真係縮到呢。
但淫賤黎轉念又問：「但係點解呢排有篇文章畀人話屈人哋前員工犯事嘅？」少膽虫當堂傻咗，指住淫賤黎碟豬肉刺身：「吓，我仲以為腦細你鍾意砌生豬肉咋！」
