城中鏡：梁卓偉升呢笑住呻苦
梁卓偉（左）同女童軍副會長蔡關穎琴同樣熱愛音樂。
食物及衞生局前副局長Gabriel梁卓偉舊年到香港大學執教鞭後，日前仲揮低三名對手，接替李心平出任港大醫學院院長，將於下月一日上任，成為該校近百年來最年輕嘅醫學院院長。日前喺一個音樂活動上見到Gabriel，於是上前恭喜佢「升呢」啦，點知佢笑笑口話：「有咩咁值得恭喜吖，苦差嚟o架！」
梁卓偉（左）同女童軍副會長蔡關穎琴同樣熱愛音樂。
梁卓偉（前右五）出現，全場靚女爭住搵佢影相。
張雅麗剛剛從峇里完婚兼度蜜月，容光煥發。
精通樂理嘅Gabriel一出現，在場嘅一班靚女都爭住同佢影相，真係魅力逼人。唔少人輪住恭喜佢，有啲嘉賓仲問佢攞新卡片，但佢似乎未習慣「院長」嘅稱呼，攤大手板話：「我都未上任，邊度有卡片啫？」其實Gabriel做官時都幫上司孭過唔少鑊，一樣游刃有餘，做院長又點會難到佢吖！」
張雅麗浪漫完婚
同場仲見到香港島婦女聯合會主席Carol張雅麗，見佢神采飛揚，佢透露啱啱去咗印尼峇里島舉行婚禮，一班親友同行，喺沙灘見證浪漫一刻。嚟緊暑假佢打算同囝囝晉熙去新加坡參觀Legoland。講到囝囝，佢甜笑話囝囝好乖，仲識得自己睇書，話志願係要做醫生喎。
