政壇：發叔聽民意反擴堆填區
發叔話聽完民意先反對政府嘅擴建堆填區計劃。
擴建屯門同打鼓嶺堆填區撥款申請，早前喺立法會財務委員會闖關失敗，多名政府官員都講話會喺適當時間再將申請提交立會，以今個立法年度就嚟收爐咁睇，最快都要等十月新立法年度開波先會再嚟過嘞！
發叔話聽完民意先反對政府嘅擴建堆填區計劃。
反對相關建議嘅新界鄉議局主席兼屯門區議會主席劉皇發，尋日喺鄉議局會議後，被記者問及會喺擴建堆填區問題上開出乜嘢條件，先至肯喺立法會投贊成票？發叔就話，佢只係代言人，聽完民意先反對政府嘅擴建堆填區計劃，所以任何事都唔係佢自己嘅要求喎！真係信不信由你。
對於有市民要求政府收回粉嶺高爾夫球場用地，擁有會籍嘅發叔就話，都係聽居民嘅意見，佢去任何地方打波都係一樣咁話。連發叔都咁講，點解政府仲要擔心班富豪冇波打呢？
