政壇：鄉議局時租車場頂爛市
新界鄉議局為開源節流發錢寒，將大樓停車場變成時租停車場。
新界鄉議局早前因沙田石門新大樓工程費搞到欠債纍纍，雖然依家變賣咗九龍塘金巴倫道舊局址，還清債務，但唔知係咪有欠債嘅陰影，為咗開源搞到發錢寒。局方委員最近除咗將開源節流掛喺口邊，仲一致通過將新大樓停車場變成時租停車場。停車場由下月一日起開放，一小時收十五元，而日泊十一小時就收八十元。雖然停車場未正式開放，但尋日已見收費價錢牌掛咗喺停車場門口，認真心急。
新界鄉議局為開源節流發錢寒，將大樓停車場變成時租停車場。
不過，我哋對比番鄉議局周邊嘅有蓋停車場，大部分時租收費都係二十元以上，有啲仲收三十元添，所以除非泊附近嘅爛地露天停車場，否則鄉議局停車場確實係不二之選，唔知咁樣算唔算頂爛市呢？
仲記得上次會議宣布成功出售舊局址後，散會即時搞盆菜宴慶功，仲話以後每月會議都會搞場盆菜宴聯誼，但尋日開會後就冇咁嘅安排，莫非好似當年「八萬五」房屋政策咁，一早就取消咗？
