政壇：田少終止辯論為外遊？
立法會財務委員會上周審議擴建屯門、打鼓嶺堆填區撥款申請，正當大家以為「長毛」梁國雄會拉布拉到天昏地暗，最後由胡志偉提出終止辯論，但竟然被田北俊「截胡」提出終止辯論，仲竟然好神奇咁通過。有建制中人指出，估計係有唔少建制派議員一早買定機票離港放暑假，先至咁順攤支持有關終止辯論。
免建制派蒙受罪名
我哋收到確實消息，唔止有泛民議員已買定機票離港，原來多位會跟隨鄉議局主席劉皇發投票意向嘅建制派議員，包括行政會議成員林健鋒、工業界梁君彥、地產建造界石禮謙等人，晨早已向立會請假，講明喺上周六起離港一星期，換句話說如果喺呢段時間投票，發叔無咗幾票支持，呢班議員投票時唔見蹤影，試問發叔面子何在呢？所以唔終止辯論都唔得。
所以有陰謀論講法，係田少明知部分建制派外遊，先特登提出終止辯論，令大家唔使蒙受「去玩唔投票」嘅罪名。不過，政界亦流傳另一版本，就係田少自己都唔得閒，預咗七月尾會飛去美國加拿大度假，所以終止辯論只係自保，並非「拯救」其他建制派。究竟真實版本係乜，相信三口六面對質都未必搵到答案囉！
