政壇：鬍鬚曾膺歷史大罪人
設計圖片及對白
財爺鬍鬚曾出任政府「大掌櫃」多年，屢遭議員批評為「守財奴」，但都未見有顯著改善，尋日連特首梁振英忠實支持者、恒隆集團主席Ronnie陳啟宗亦加入戰團。
設計圖片及對白
香港發展論壇尋日舉行論壇大談香港前景，三名梁營中堅分子Ronnie、行政會議成員張志剛同正在休假嘅行會成員林奮強都有出席，其中Ronnie大談梁班子表現，首先形容梁振英即使「做得好定唔好」，部分人亦唔希望佢做得好，甚至當梁做得好時亦會醜化佢做得唔好。
功能組別可互相制衡
不過，當談及鬍鬚曾時，Ronnie一百八十度大變調，批評鬍鬚曾做唔到「應使則使」，又直言如果不能繼續製造就業機會，不能令工作崗位繼續增加，香港就會失去「黃金五十」時機︰「我哋嘅財爺（曾俊華）唔想使錢，我唔知點解，呢個歷史會證明係香港一個大問題，甚至講得白啲係『大罪人』。」佢喺論壇後被追問鬍鬚曾會成為「大罪人」一事，未有再作闡釋，僅稱「應該使番多啲錢，應使則使」。林奮強發言時亦疑似同Ronnie一唱一和，直言香港黃金五年有三千五百億元儲備可以使用，相等於興建五十間瑪麗醫院或五十間科技大學，又認為香港客觀上可以更上一層樓，最大問題係「有市場、有錢、爭個心」喎。
畀佢哋咁插法，唔知鬍鬚曾為免令一眾批評者收聲，會否喺明年嘅財政預算案做齣好戲大反擊呢？
喺論壇講到政改問題時，本身係地產商嘅Ronnie稱，贊成一人一票制度，同時也要有功能組別，兩者要互相制衡，呢個亦符合《基本法》中均衡參與嘅原則，又話︰「所以我話你跟西方走極端（政制發展），你可能會suffer（遭受）西方所suffer嘅事，香港真係身在福中不知福。」佢突然出招話支持功能組別，睇怕一直支持取消功能組別嘅泛民主派，會同佢有一番激辯喇！
